வெஜிடபுள் பிரியாணி

தேதி: January 31, 2009

பரிமாறும் அளவு:

ஆயத்த நேரம்: 10 நிமிடங்கள்

சமைக்கும் நேரம்: 30 நிமிடங்கள்

மொத்த நேரம்: 40 நிமிடங்கள்

4
Average: 4 (4 votes)

கனடாவில் வசித்து வரும் இலங்கை தமிழரான <b> செல்வி. விசா </b> அவர்கள் திருமதி. நர்மதா அவர்களின் குறிப்பினை பார்த்து சில மாற்றங்களுடன் செய்து காட்டியுள்ள குறிப்பு இது.

 

பாஸ்மதி அரிசி - 2 கப்
சிறிய உருளைக்கிழங்கு - 6
கேரட் - 2
நறுக்கிய முட்டைகோஸ் - 2 கப்
டோஃபு (Tofu) / பனீர் - 250 கிராம்
பெரிய வெங்காயம் - 2
தக்காளி - 2
பச்சைப்பட்டாணி - ஒரு கப்
பச்சை மிளகாய் - 5
ஏலக்காய் - 6 + 3
கிராம்பு - 5
கறுவாப்பட்டை - 4" துண்டு + ஒரு சிறிய துண்டு
பிரிஞ்சி இலை - 2
முந்திரி - 20
பிளம்ஸ் (Raisins) - 35 கிராம்
கொத்தமல்லித்தழை - 1/4 கப்
உப்பு - தேவையான அளவு
மஞ்சள் தூள் - 1/2 தேக்கரண்டி
எண்ணெய் - பொரிப்பதற்கு
பட்டர் / நெய் - 3 மேசைக்கரண்டி
மிளகாய்த்தூள் - சிறிது


 

பட்டாணியை சிறிது உப்பு போட்டு வேக வைத்து எடுத்துக் கொள்ளவும். அரிசியை களைந்து ஊற வைத்துக் கொள்ளவும்.
தக்காளியை சிறுத் துண்டுகளாக நறுக்கிக் கொள்ளவும். உருளைக்கிழங்கை நீளமானத் துண்டுகளாக நறுக்கவும். வெங்காயத்தை நீளமான சிறிய மெல்லிய துண்டுகளாக நறுக்கவும். கேரட்டை ஒரு அங்குல நீளமான மெல்லிய துண்டாக நறுக்கிக் கொள்ளவும்.
ரைஸ் குக்கரில் ஊற வைத்த அரிசியை போட்டு மஞ்சள் தூள், கறுவாப்பட்டை, 3 ஏலக்காய், பிரிஞ்சி இலை ஆகியவற்றை போட்டு தேவையான அளவு தண்ணீர் ஊற்றி குழைய விடாமல் வேக வைத்துக் கொள்ளவும். அரிசி அரைப்பதம் வெந்ததும் அதில் சிறிது உப்பு, 2 மேசைக்கரண்டி நெய் அல்லது பட்டர் சேர்த்து கிளறி விடவும்.
நறுக்கி வைத்திருக்கும் உருளைக்கிழங்குடன் தேவையான அளவு உப்பு மற்றும் மிளகாய் தூள் சேர்த்து பிரட்டி பொரித்தெடுத்துக் கொள்ளவும்.
அதேப் போல் வெங்காயம், டோஃபு/பனீரையும் உப்பு, மிளகாய்தூள் சேர்த்து பிரட்டி பொரித்தெடுக்கவும்.
வாணலியில் ஏலக்காய், கிராம்பு, கறுவாபட்டையை போட்டு வறுத்து மிக்ஸியில் கொரகொரப்பாக பொடி செய்துக் கொள்ளவும்.
அதே வாணலியில் பட்டர் அல்லது நெய் ஊற்றி இரண்டாக உடைத்த முந்திரி, பிளம்ஸை போட்டு வறுத்து எடுத்துக் கொள்ளவும்.
ஒரு பாத்திரத்தில் 2 மேசைக்கரண்டி எண்ணெய் ஊற்றி காய்ந்ததும் கடுகு, பெரியசீரகம் போட்டு பொரிய விடவும். அதனுடன் சிறிது உப்பு, நீளமாக நறுக்கிய பச்சை மிளகாய், கேரட், முட்டைகோஸ் போட்டு மூடி மிதமான தீயில் 7 - 8 நிமிடங்கள் வேக விடவும்.
அதன் பின்னர் வேக வைத்த காய்கறிகளுடன் நறுக்கின தக்காளியை போட்டு 4 - 5 நிமிடங்கள் கிளறி விடவும்.
தக்காளி கேரட், கோஸ் கலவையுடன் சேர்ந்ததும் வேக வைத்த பட்டாணி, வறுத்து பொடித்த தூள், சாதம் ஆகியவற்றை கொட்டி கிளறவும்.
பின்னர் பொரித்த உருளைக்கிழங்கு, பனீர்/டோஃபு, வெங்காயம் ஆகியவற்றைப் போட்டுக் கிளறவும். இறுதியாக பொரித்த முந்திரி மற்றும் பிளம்ஸை போட்டுக் கிளறவும்.
சுவையான கம கம வெஜிடபுள் பிரியாணி தயார். இதனை பரிமாறும் தட்டில் வைத்து மேலே கொத்தமல்லித்தழை தூவி பரிமாறவும்.


உறுப்பினரது அண்மைக் குறிப்புகள்

இணையான குறிப்புகள்


Comments

எல்லா டிஷ்ஷையும் Colourful-ஆ பண்ணி காமிச்சு கலக்கறீங்க.

Patience is the most beautiful prayer!!

Patience is the most beautiful prayer!!

வாவ். பார்க்கும் போதே சாப்பிடதோனுது, வாய் ஊர வச்சிட்டீங்க.நான் இதை செய்து பார்கிரேன்alhamdhulillah

alhamdhulillah

உருளை,வெங்காயம்,பனீர் பொரிதெடுத்து சேர்ப்பதால் இது வித்தியாசமான ரிச் சுவையுடைய வெஜ் பிரியாணியாகத்தான் இருக்கும்.
என்றென்றும் அன்புடன்,
ஆசியா உமர்.

என்றென்றும் அன்புடன்,
ஆசியா உமர்.

பார்த்ததும் சாப்பிடனும்னு தான் தோணுது, சரி இவ்ளோ அழகா எப்படி காய்கறியை கட் பண்ணீங்க?கத்தில இது மாதிரி கட் பண்ணமுடியுமா? யாராவது தெரிஞ்சா சொல்லுங்க, சீக்கிரன் ட்ரை பண்ணி பார்த்துவிட்டு, பின்னூட்டல் தரேன்பா.ரொம்ப தேங்ஸ் செல்வி.விசா மற்றும் திருமதி.நர்மதா..

விசா
எப்படி இவ்வளவு அழகா பொறுமையா செய்தீங்க. நான் சமையலில் நாலைந்து steps இருந்தாலே தவிர்த்துடுவேன். பார்க்கவே ரொம்ப நல்லாயிருக்கு .

அன்புடன்
கிருத்திகா

ஹலோ amarakbaranthony (உங்களை எப்படிக் கூப்பிடுறது?), நன்றி :-)

ஹலோ HAJAJASMINE, நன்றி :-) நன்றாக இருக்கும் செய்து பாருங்கள் (நன்றி நர்மதா அக்கா).

ஹலோ ஆசியா உமர் மேடம்,
நீங்கள் சொல்வதுபோலவே நன்றாக இருந்தது.

ஹலோ தாமரை மேடம்/ அக்கா எப்படி கூப்பிட? பாராட்டுகளுக்கு நன்றி. கத்தியால்தாங்க வெட்டினேன்...செய்துபார்த்து நிச்சயமாய் பின்னூட்டம் கொடுங்கள்.

ஹலோ kirthika, நன்றி :-)

நர்மதா அக்கா, உங்கள் குறிப்புக்கு மிக்க நன்றி :-)

அன்புடன்,
விசா

மேடம் எல்லாம் வேண்டாம்,நீங்க தாமரைன்னே என்ன கூப்பிடலாம்,ஆனால் அக்கானு கூப்பிட்டலும் சந்தோசம் தான்..சரி கத்தில வெட்டினீங்களா?ஆச்சரியம் எப்படினு கொஞ்சம் முடிஞ்சா விளக்குங்க,ஏன்னா நான் கட் பண்ணினால் இவ்ளோ அழகா வர மாட்டேங்குதுபா..

விசா முகப்பை பார்த்ததும் நீங்களா இருக்கும் என்று தான் ஓப்பன் செய்தேன்.
ரொம்ப அருமை.
ஜலீலா

Jaleelakamal

ஹலோ தாமரை அக்கா, மரக்கறிகளை முதலில் குறுக்காக வெட்டிவிட்டு (ஓரே தடிப்பில்) பின் நீளவாக்கில் வெட்டினேன்...ஒரு வேளை ஆறுதலாக வெட்டுவதாக இருக்கும்...நான் நல்லா டைம் எடுத்து வெட்டுவேன் :-)

ஹலோ ஜலீலா மேடம், நன்றி :-)

அன்புடன் விசா

ரொம்ப நன்றிபா பதில் அனுப்பினதுக்கு, உங்களுக்கு ரொம்ப பொருமை தான், நானும் ட்ரை பண்ணி பார்க்கிறேன்பா..

இந்த வெஜிடபுள் பிரியாணி செய்து பார்த்தேன் சூப்பராக வந்தது. உடனே போடோ எடுத்து யாஹூவில் பேசிக்கொண்டிருக்கும்போதே அனுப்பினேன். சகோதரியின் மகள் உடனே செய்யப்போவதாகச் சொன்னா. அது மட்டுமா எனக்கும் பாராட்டு மழைதான். இது அத்தனையும் விசாவிற்கும், நர்மதாவிற்கும்தான். நன்றி விசா, நர்மதா.

அன்புடன் ரிகா.

ஹலோ ரிகா,
செய்து பார்த்து பின்னூட்டம் அளித்தமைக்கு நன்றி :-)
எனக்கும் கூட இது மிகவும் பிடித்திருந்தது அதனால் தான் யாரும் சமைக்கலாமிற்கு அனுப்பினேன். குறிப்பு கொடுத்த நர்மதா அக்காவிற்குத்தான் நன்றி சொல்லவேண்டும், நன்றி :-)

அன்புடன் விசா

அன்பின் விசா, எனது குறிப்பை செய்து பார்த்து அதனை அழகாக படமெடுத்து அனுப்பிய உங்களுக்கு நன்றி.

மற்றும் பாராட்டிய அனைவருக்கும் நன்றி.
-நர்மதா :)