கவிதை தொகுப்பு - 3

சிகரெட்

காதலியே! அன்று...
கண்டதும் காதல் கொண்டேன்
கடிதத்தில் உள்ளம்
உரைத்தேன்
காத்திருந்தேன் துணை
வருவாயென...

புதிராய் நீ விலக
என் உதட்டிற்கும்
விரலிற்கும்
இடையில் தீ பொட்டுடன்
புதிதாய் உறவானதோ
சிகரெட்...

கடந்தன வருடங்கள் பல
கல்யாணமும் நடந்தது
வேறொருவளுடன்
கடமையில், உறவில் கலைந்தது
காதல்! இன்று...

மனைவிக்கும் மக்களுக்கும்
இடையில்
மறைந்த உன் முகத்தையும்
மறந்த என் காதலையும்
மரணத்தின் பயணத்தில்
நினைவுபடுத்துகிறது...

என் நுரையீரல் புற்றுநோய்!!

- டெய்ஸி

தந்தையும் நானும்

பார்த்து பார்த்து
தேந்தெடுத்த உடைகள்..
பத்தியமாய் செய்த உணவு..
பார்த்து மகிழ
தொலைக்காட்சி, இணையம்
இன்னும் பிற..
இறுமாப்புடன் கேட்டேன்
தந்தையை பார்த்து,
இன்னும் என்ன வேண்டும்
உங்களுக்கு?
எனக்காக நீ செலவிடும் நேரம்
இடியாய் வந்திறங்கியது
பதில்.

- இலட்சுமி சுந்தர்

மனசு

கேட்கிறது
குழந்தையின் அழுகுரல்!!
பார்க்கும்
மனது பதறுகிறது!!
தொலைக்காட்சி பெட்டி!!

போர் வீரன்

கொட்டும் பனியிலே!
தீவிர பணியிலே!

அல்லும் பகலும்
நித்திரை இல்லாமல்
முத்திரை பதிக்கிறான் -
எங்கள்
போர் வீரன் !!

- சுபா

அவள்..

ஒரு நூறு
முகங்களின் அறிமுகத்தில்
பதிந்து போனது
உனது முகம் மட்டும்

அதிகமில்லை பழக்கம்
பரஸ்பர பகிர்வுக்கு
நான்கு பொழுதுகள்

பிடுங்க முடியாத
முள்ளாய்
சொருகிய நினைவுகள்

சலசலக்கும்
தென்னங்கீற்றுகள்
உன் சிரிப்பின் ஞாபகம்