கேமல் ஸ்டிச் டிசைன் ஹெட்பேண்ட்

வழங்கியவர்:

தேதி: February 27, 2013

உல்லன் நூல்
குரோசே ஊசி - D/3.25MM

உல்லன் நூலை ஊசியில் முடிச்சுப் போட்டு 8 சங்கிலிகள் போடவும். அல்லது ஹெட்பேண்டு எந்த அளவு அகலமாக வேண்டுமோ அந்த அளவிற்கு சங்கிலிகள் போடவும்.

கடைசி சங்கிலிக்கு முன்னால் உள்ள சங்கிலியில் ஊசியை நுழைத்து நூலை இழுத்து தனி குரோசே பின்னல் (Single Crochet) போடவும்.

இப்படியே 8 சங்கிலிகளிலும் தனி குரோசே பின்னல் போட்டு கடைசியாக ஒரு சங்கிலி கூடுதலாக போட்டு, பின்னி வைத்திருக்கும் பட்டையான நூலை திருப்பவும்.

இப்போது படத்தில் உள்ளதுபோல் போட்டு வைத்திருக்கும் தனி குரோசே பின்னல்களில் முதல் சங்கிலிக்கு கீழ் ஊசியை நுழைத்து பார்த்தால் ஊசிக்கு மேல் இரண்டு நூல் இருப்பது போல தெரியும். அதற்கு நடுவில் ஊசியை நுழைத்து மறுபடியும் தனி குரோசே பின்னல் போட்டு பின்ன தொடங்கவும்.

அனைத்து சங்கிலிகளிலும் இதேபோல் போட்டு, முடிக்கும் போது மேலே சொன்னது போல் இரண்டு நூலுக்கும் இடையில் நுழைக்காமல் அடியில் நுழைத்து, கூடுதலாக ஒரு சங்கிலி போட்டு நூலை திருப்பி பின்னவும்.

இப்படியே ஒவ்வொரு பக்கமாக திருப்பி, தலையின் சுற்றளவிற்கு ஏற்ப, தேவையான நீளத்திற்கு பின்னவும். கடைசியில் இரண்டு ஓரங்களையும் சேர்த்து தனி குரோசே பின்னல்களால் பின்னி முடிச்சு போடலாம் அல்லது ஊசியால் தைக்கலாம்.