கேப்பை கூழ்

வழங்கியவர்:

தேதி: January 15, 2015

பரிமாறும் அளவு:

ஆயத்த நேரம்: 10 நிமிடங்கள்

சமைக்கும் நேரம்: 30 நிமிடங்கள்

மொத்த நேரம்: 40 நிமிடங்கள்

கிச்சன் குயின் பகுதிக்காக தேர்வு செய்யப்பட்ட வனிதா அவர்களின் கேப்பை கூழ் குறிப்பு, விளக்கப்படங்களுடன் இங்கே செய்து காட்டப்பட்டுள்ளது. குறிப்பினை வழங்கிய வனிதா அவர்களுக்கு நன்றிகள்.

கேப்பை மாவு (ராகி / குரக்கன் / கேழ்வரகு) - ஒரு கப்
உப்பு - தேவையான அளவு
அரிசி நொய் - கால் (அ) அரை கப்
தயிர்
சின்ன வெங்காயம் (அ) மாங்காய்

கேப்பை மாவை தோசை மாவு பதத்திற்கு கரைத்து ஒரு இரவு, ஒரு பகல் புளிக்கவிடவும். அரிசி நொய்யை வேக வைத்து (பொங்கி) வைக்கவும்

பாத்திரத்தில் தண்ணீர் வைத்து கொதி வந்ததும், புளித்த கேப்பை மாவை ஊற்றி கிளறி கொண்டே இருக்கவும்.

பாதியளவு வெந்ததும், பொங்கிய அரிசி நொய்யைச் சேர்த்துக் கிளறி வேக வைக்கவும். அரிசி நொய்யைப் போட்டதும் நிறம் மாறும், வெந்துவிட்டது என நினைக்க வேண்டாம். கையில் தண்ணீர் தொட்டு, கூழை தொட்டு பார்க்கவும். கையில் ஒட்டாத பதத்திற்கு வெந்ததும் இறக்கிவிடவும்.

இதை உருண்டைகளாக்கி அப்படியே குழம்பு தொட்டு சாப்பிடலாம். அப்படியே கரைத்தும் குடிக்கலாம் (சுடு கூழ் என்று சொல்வார்கள். ஆனால் அவ்வளவு ருசியாக இருக்காது).

கூழை ஆற வைத்து பானை (அ) பிரிட்ஜில் வைத்து மறு நாள், இதில் தயிர், உப்பு, சேர்த்து கரைத்து பரிமாறவும். ருசியான கேப்பை கூழ் தயார்.

இந்தக் கூழுடன் மாங்காய், மிளகாய் வற்றல் (அ) மிளகாய் தூள், உப்பு சேர்த்து ஒன்றிரண்டாக இடித்து சேர்த்து சாப்பிடலாம் அல்லது மோர் மிளகாய் வறுத்து வைக்கலாம். சின்ன வெங்காயம் (அ) பிஞ்சு பச்சை மிளகாய் (அ) எலுமிச்சை ஊறுகாய் தொட்டு சாப்பிடலாம்.

அரிசி நொய் இல்லாதவர்கள், புழுங்கல் அரிசியை மிக்ஸியில் ஒன்றிரண்டாக உடைத்துக் கொள்ளலாம். சில நேரத்தில் அரிசி ஊற வைத்து, காய வைத்து உடைத்தும் செய்யலாம். நொய்யை முதலில் பொங்கியும், மாவை சேர்க்கலாம்.