தளபதி விஜய் அவர்களுடன் – தங்கமான தருணங்கள்!

வணக்கம், வணக்கம்!

ரொம்ப நாளைக்கப்புறம் ப்ளாக் எழுதலாம் என்று உட்கார்ந்தால், எழுதவே ஓட மாட்டேனெங்கிறது. சோம்பேறித்தனமாக இருந்து பழகி விட்டது போல!

அதுக்காக எழுதாம இருக்க முடியுமோ?

ஏற்கனவே ஒரு பதிவில் என் கணவர் ‘கத்தி’ படத்திலும் மற்ற படங்களிலும் நடித்ததைப் பற்றி, பதிவிடுகிறேன் என்று சொல்லியிருந்தேன்.

ஃபேஸ்புக்கில் என் கணவர் போஸ்ட் செய்திருந்ததை, அவர் வார்த்தைகளிலேயே இங்கே பதிவிடுகிறேன்.

(அருள் பாஷையில் சொன்னால் ‘செல்ஃப் டப்பா :):))

இனி - ஓவர் டு திரு சுப்ரமணியம் (எல்லாம் டி.வி. மேட்ச் பார்த்த பாதிப்பு)

மதுரையில் வேலை பார்த்து, ரிடையர் ஆன பிறகு, சென்னைக்கு வந்து - திரைப்படங்களிலும், சீரியல்களிலும், விளம்பரப்படங்களிலும் நடித்தது, மிகவும் அருமையான வித்தியாசமான அனுபவங்களைத் தந்தது.

‘கத்தி’ படத்தில் நடிகர் விஜய்யுடன், முருகதாஸ் டைரக்‌ஷனில் நடித்தது மறக்கவே முடியாத ஒன்று.

ஆகஸ்ட் 18, 2013 அன்று, டைரக்டர் முருகதாஸ் அவர்களே நேரடியாக செலக்ட் செய்தார். என்னுடன் என்னைப் போல சீனியர் சிட்டிஸன்கள்(!) பலரும் தேர்ந்தெடுக்கப்பட்டனர்.

அஸிஸ்டெண்ட் டைரக்டர் எங்களிடம் வந்து, நாங்கள் தாடி வளர்க்கத் தொடங்க வேண்டும் என்றும், அந்த கெட் அப் படம் முடியும் வரையிலும் இருக்க வேண்டும் என்றும் சொன்னார்.

தளபதி விஜய்யுடன் படம் முழுவதும் வரும் வாய்ப்பு என்று தெரிந்தபோது – பிரமிப்பாகவும், எக்ஸைடட் ஆகவும் இருந்தது.

விஜய் மிகவும் ரிசர்வ்ட் என்று சொல்வார்களே, படப்பிடிப்பில் அவருடன் பேச முடியுமா என்று ஆவலாக இருந்தது.

ஆனால், விஜய் படப்பிடிப்பில் எல்லோருடனும் அன்புடனும் சகஜமாகவும் பழகி, எங்கள் அனைவரையும் ஆச்சரியப்பட வைத்தார்.

எங்கள் சக நடிகர் ஒருவருக்கு பிறந்த நாள் வந்த போது, கேக் வெட்டி, எங்களுடன் அவரது மகிழ்ச்சியைப் பகிர்ந்து கொண்டார்.

புஷ்பா கார்டன்ஸ், வளசரவாக்கத்தில் முதியோர் இல்லம் செட் போடப்பட்டு, கிட்டத்தட்ட ஒரு வருடத்துக்கு மேல் படப்பிடிப்பு நடந்தது.

ஒரு நாள் படப்படிப்பின்போது, சகஜமாக என் அருகில் அமர்ந்து, என்னைப் பற்றி, என் குடும்பத்தைப் பற்றி, விசாரித்து, கிட்டத்தட்ட 15 நிமிடங்களுக்கு மேல், உரையாடியது மறக்கவே முடியாது.

படத்தில் விஜய், முதியோர் இல்லத்தில் எங்கள் அனைவரிடமும், மீடியாவின் கவனத்தை திருப்புவது பற்றி பேசுவது போல ஒரு காட்சியை பார்த்திருப்பீர்கள்.
மிக நீண்ட வசனம் – ஏற்ற இறக்கங்களுடன் – உணர்ச்சி ததும்ப அவர் பேசியபோது, எல்லோரும் பிரமித்துப் போனோம்.

காட்சி படமாகி முடிந்து, அவர் கிளம்பத் தயாரான போது, அவர் அருகில் சென்று – ’சார், ஒரு நிமிஷம் உங்களோட பேசணும்’ என்றேன்.

‘சொல்லுங்க’, என்றார் சகஜமாகவும் அன்புடனும்.

‘ரொம்ப அருமையாக, பிரமாதமாகப் பேசினீங்க சார், இந்த சீன் ரசிகர்ளிடமும் பொதுமக்களிடமும் மிகப் பெரிய வரவேற்பைப் பெறும்’, இந்த சீன் நிச்சயமாக மிகப் பெரிய அளவில் பேசப்படும் சார்’, என்று என்னுடைய பாராட்டுக்களை மனப்பூர்வமாக தெரிவித்தேன்.

‘உங்களுக்குப் பிடிச்சிருந்ததா சுப்ரமணியம் சார், ரொம்ப தாங்க்ஸ்’ என்று மலர்ந்த முகத்துடன் அவர் நன்றி சொன்ன போது, சந்தோஷமாக இருந்தது.

அவருடன் படத்தில் சிறிய வேடத்தில் நடித்த என்னுடைய பாராட்டுக்களை, முக்கியத்துவம் கொடுத்து, நன்றி சொன்னது, அவர் மேல் இருக்கும் அன்பையும் மரியாதையையும் இன்னும் அதிகரித்தது.

அவரது பிறந்த நாளுக்கு சில நாட்களுக்கு முன்னால் –

யூனிட்டில் ‘விஜய் எல்லோருக்கும் பிரியாணி விருந்து கொடுக்கப் போறாராம்’ என்று பேசிக் கொண்டார்கள்.

யூனிட் மட்டும்தான் – இல்ல இல்ல – கூட நடிக்கிற நம்ம எல்லோருக்கும்தான், என்று ஒரு ஊகம்.

எல்லோரையும் குடும்பத்துடன் வரச் சொல்லப் போறாங்களாம் என்று ஒரு தகவல்.

அது எப்படி முடியும், கல்யாண வீடு மாதிரி இருக்குமே என்று ஒரு பேச்சு.
யாருக்கும் உறுதியாகத் தெரியவில்லை.

சில நாட்களுக்குப் பிறகு – படப்பிடிப்புக்குக் காலையில் வந்தவுடன், யூனிட்டிலிருந்த எல்லோருக்கும் தகவல் சொல்லப்பட்டது.

இன்று மதியம் விஜய் எல்லோருக்கும் விருந்து வழங்குகிறார். எல்லோரும் குடும்பத்துடன் வரும்படி அழைத்திருக்கிறார்!!!

அனேகமாக எல்லோருமே தயாராகத்தான் இருந்தார்கள். அவரவர் வீட்டுக்கு ஃபோன் கால்கள் பறந்தன.

பின்னே???!!!! தளபதி விஜய் தரும் விருந்தில் கலந்து கொள்வது என்றால் சாதாரண விஷயமா?

நான் என் மனைவியிடம் ஃபோனில் தகவல் சொல்லி விட்டு, வீட்டுக்குப் போய் அழைத்துக் கொண்டு வந்தேன்.

என் மனைவியிடம் பல கேள்விகள் இருந்தன –

விஜய்யைப் பார்க்க முடியுமா? ஷூட்டிங் பாக்கலாமா? விஜய் பேசுவாரா? ஃபோட்டோ எடுக்க அலவ் பண்ணுவாங்களா என்றெல்லாம் கேட்டுக் கொண்டே வந்தார்.

எதற்கும் இருக்கட்டும் என்று காமிராவையும் கொண்டு வந்தார்.

மதிய விருந்துக்கு சிறப்பான ஏற்பாடுகள் செய்யப்பட்டு இருந்தன.

சைவம், அசைவம் என்று தனித் தனியான பந்திகள்.

எல்லோரையும் மகிழ்ச்சிக் கடலில் ஆழ்த்தும் விதமாக, நடிகர் விஜய் அவர்களே, எஙகள் அனைவருக்கும் பிரியாணி பரிமாறி, விருந்து அளித்தார்.
ஆம், கிட்டத்தட்ட 400 பேருக்கும் மேல் வந்திருந்தோம்.
அத்தனை பேருக்கும் பொறுமையாகவும் சிரித்த முகத்துடனும், அவரே பரிமாறினார்.

எல்லோருக்கும் பரிமாறி முடித்து, எல்லோரும் சாப்பிட்டாச்சா என்று கேட்டுத் தெரிந்து கொண்டு, அதற்குப் பிறகுதான் அவர் சாப்பிட்டார்.

இது மட்டுமா?!

முதியோர் இல்லத்தில் வசிப்பவர்களாக நடித்த எங்கள் அனைவருக்கும் அன்று உடைகள் பரிசளித்தார்.

அத்துடன் ஒவ்வொருவருடைய குடும்பத்தினருடனும், தனித்தனியாக ஃபோட்டோ எடுத்துக் கொண்டார்.

அனைவரிடமும் அன்புடன் உரையாடினார்.

கிட்டத்தட்ட ஒன்றரை வருடங்கள் - கத்தி படத்தில் அவருடன் நடித்தது மறக்க முடியாத ஒன்று.

படப்பிடிப்பு நிறைவடைந்து, சில வாரங்களுக்குப் பிறகு – மீண்டும் ஒரு தகவல் –
டைரக்டர் முருகதாஸ், நடிகர் விஜய் இருவரும் எங்கள் அனைவரையும் மீண்டும் சந்திக்க அழைத்திருக்கிறார்கள்.

இங்கே நாங்கள் என்று நான் குறிப்பிடுவது – படத்தில் முதியோர் இல்லத்தில் வசிப்பவர்களாக நடித்தவர்கள் – கிட்டத்தட்ட 40 பேர் – எல்லோருமே அறுபது வயதைக் கடந்தவர்கள்.

எங்கள் அனைவரிடமும் டைரக்டர் முருகதாஸ் சகஜமாக, சிரித்துப் பேசிக் கொண்டிருப்பார்.

ஆந்திராவில் படப்பிடிப்பு நடந்த போது – எங்கள் அனைவரிடமும் படம் முடிந்த பிறகு ஒரு நாள் சந்தித்துப் பேச வேண்டும் என்று சொல்லியிருந்தார்.

விஜய் அவர்கள் ஏற்கனவே விருந்து கொடுத்து விட்டாரே, இப்போது மீண்டும் சந்திப்புக்கு அழைத்திருக்கிறாரே என்று ஒரு ஆச்சரியம்.

ஏவிஎம் ஸ்டுடியோவில் மாலை நேரத்தில் எல்லோரும் கூடினோம்.

விஜய் எங்கள் எல்லோருக்கும் விலை உயர்ந்த வாட்ச் பரிசளித்து, ஆச்சரியத்திலும், ஆனந்தத்திலும், திக்கு முக்காட செய்தார். அத்துடன் படப் பாடல்கள் அடங்கிய சி.டி. ஒன்றும் வழங்கப்பட்டது.

விஜய், முருகதாஸ் இருவருடன், புகைப்படம் எடுத்துக் கொண்டோம்.

என் கைகளைக் குலுக்கி, தோள் மீது கை போட்டு, அன்புடன் என்னை அணைத்துக் கொண்டார் விஜய்.

மறக்க முடியுமா – அந்தத் தங்கத் தருணங்களை!!!

5
Average: 5 (8 votes)

Comments

ஏற்கனவே அங்கங்க பார்த்த, படித்த விடயங்களாக இருந்தாலும் இப்படி உங்கள் இடுகையாக ஒரே இடமாகப் படிக்கப் பிடித்திருக்கிறது. எதிர்பாரத சமயம் திரையில் சுப்ரமணியம் அண்ணனைக் காணும் போது, சந்தோஷத்தில் பக்கத்தில் இருப்பவரிடம், உங்கள் இருவரைப் பற்றியும் தெரிந்த எல்லா விடயங்களையும் பெருமையாகப் பகிர்ந்து கொள்வேன். அதே சந்தோஷம் இப்போதும்.

இப்போ க்றிஸ்ஸையும் மம்மியையும் படிக்க வைக்கலாம். நன்றி சீதா. விஜய்யுடன் நிறுத்தி விடாதீங்க. நீங்க எழுத இன்னும் விடயங்கள் இருக்கின்றன இல்லையா! ஆவலுடன் எதிர்பார்க்கிறேன்.

‍- இமா க்றிஸ்

2 நாட்கள் முன்னால ஒரு தோழியுடன் உங்கள் தோற்றம், அழகு, சிரித்த முகம் பற்றிப் பேசினேன். அவங்க உங்களைக் கண்டதில்லை என்றாங்க. இப்போ இங்கே பார்த்திருப்பாங்க. :-)

‍- இமா க்றிஸ்

அன்பு இமா,

ஆஹா, எனக்கு வெட்கத்தில் முகம் சிவக்குது, நன்றி, நன்றி.

அறுசுவையில் ப்ளாக் எழுதி ஆறு மாதத்துக்கு மேல் ஆகிட்டுது. எழுதணும்னு இப்ப ஒரு மாசமாக முயற்சிக்கிறேன், முடியல. ஒரு முறை எழுதி, ஸேவ் ஆகாமல், பதிவு போட முடியலை.

கண்டிப்பாக பதிவு போடணும்னு, இந்தப் பதிவை இங்கே போட்டு விட்டேன்.

இவங்களும் திரையில் தோன்றி, சில மாதங்களாகி விட்டது. இனி பழையபடி தொடரணும்னு தோணுது. பார்க்கலாம்.

அம்மாவும் க்ரிஸ் அவர்களும் என்ன சொன்னாங்கன்னு சொல்லுங்க.

இன்னும் நிறைய எழுதணும், இப்போதைக்கு அடுத்தாற் போல, தல அஜித் பற்றி ஒரு பதிவு, அதுக்கப்புறம் தொடர்ந்து வருவேன்னு நினைக்கிறேன்.

அன்புடன்

சீதாலஷ்மி

நான் குறிப்பிட்டதும் அதைப் பற்றித்தான். :-) சீக்கிரம் போடுங்க.

‍- இமா க்றிஸ்

இப்போதான் நான் கத்தி பாத்தேன் ஆனா ஆள் தெரியாததால சரியா பாக்கள இப்போ உங்களுக்காகவே மறுபடியும் பாக்கணும் ... விஜய் யை இப்போதான் எனக்கு ரொம்ப பிடிக்க ஆரம்பிச்சிருக்கு , இந்த பதிவு இன்னும் அதிகமாக்குது .. உங்கள நான் ஏற்கனவே பார்திருகேன்.இப்போ ஜோடியாய் !

நல்லது மட்டுமே நினையுங்கள் அடுத்தவர்க்கு ..நல்லதே நடக்கும் உங்களுக்கு ..