வழங்கியவர்:

தேதி: October 17, 2008

பரிமாறும் அளவு:

ஆயத்த நேரம்: 10 நிமிடங்கள்

சமைக்கும் நேரம்: 30 நிமிடங்கள்

மொத்த நேரம்: 40 நிமிடங்கள்

கனடாவில் வசித்து வரும் இலங்கை தமிழரான செல்வி. விசா தற்போது முதுகலை அறிவியல் பயின்று வருகின்றார், கூடவே சமையலும். சமைக்க ஆரம்பித்தது மூன்று வருடங்களுக்கு முன்புதான் என்றாலும், அதீத ஈடுபாட்டின் காரணமாக இன்று பல்வேறு உணவுகளை சுவைபட தயாரிப்பதில் திறன்பெற்றவராய் இருக்கின்றார். கேக், குக்கீஸ் செய்வதை தனது தனித்திறமையாக குறிப்பிடும் இவர், வரைதல், கைவினைப்பொருட்கள் செய்தல் போன்றவற்றை கொண்டு ஓய்வுப் பொழுதினை செலவு செய்கின்றார்.

<b>சுண்டலுக்கு தேவையானவை:</b>
கடுகு - ஒரு டீஸ்பூன்
வெங்காயம் - ஒன்று (பெரியது)
பெருஞ்சீரகம் - 2 டீஸ்பூன்
செத்தல் மிளகாய் - 4
கறிவேப்பிலை - 1 அல்லது 2 கொத்து
மோர் மிளகாய் - 8 லிருந்து 10
கடலை டின் - ஒன்று
உப்பு - தேவையான அளவு
எண்ணெய் - ஒரு டேபிள்ஸ்பூன்
<b>கருஞ்சுண்டலுக்கு தேவையானவை:</b>
சுண்டல் - ஒரு டின்
சிவப்பு வெங்காயம் - ஒன்று (பொடியாக நறுக்கியது)
பச்சை மிளகாய் - 2 (பொடியாக நறுக்கியது)
எலுமிச்சம் சாறு - சிறிது
மிளகாய் தூள் - 1/2 டீஸ்பூன்
உப்பு - தேவையான அளவு

வெங்காயத்தை மெல்லியதாக நறுக்கி வைத்துக் கொள்ளவும். செத்தல் மிளகாயை இரண்டாக கிள்ளி வைக்கவும்.

ஒரு பானில் எண்ணெய் ஊற்றி காய்ந்ததும் கடுகை போட்டு பொரிய விடவும்.

கடுகு பொரிந்ததும் நறுக்கி வைத்திருக்கும் வெங்காயத்தை போட்டு 2 நிமிடங்கள் வதக்கவும்.

அதனுடன் செத்தல் மிளகாய், கறிவேப்பிலை, பெருஞ்சீரகம் போட்டு மேலும் ஒரு நிமிடம் வதக்கவும்.

மோர் மிளகாயும் சேர்த்து வெங்காயம் நன்கு வதங்கும் வரை மிதமான தீயில் வைத்து வதக்கவும்.

வதக்கியவற்றுடன் கடலையை சேர்த்து எல்லாம் ஒன்றாக சேரும்படி கிளறி விடவும். மோர் மிளகாயில் உப்பு சேர்ந்திருப்பதால் உப்பு சேர்க்க தேவையில்லை. தேவைப்பட்டால் சுவைக்கேற்றவாறு சேர்த்துக் கொள்ளவும்.

சுவையான சுண்டல் ரெடி. இதில் சேர்க்கப்பட்டிருக்கும் பொருட்கள் எல்லாம் அவரவர் சுவைக்கேற்ப மாற்றிக் கொள்ளலாம்.

கடலையை சிறிது நேரம் சூடுப்படுத்தி வைத்துக் கொள்ளவும். வெங்காயம், பச்சை மிளகாய் இரண்டையும் நறுக்கி வைத்துக் கொள்ளவும்.

ஒரு பாத்திரத்தில் கடலை, வெங்காயம், பச்சை மிளகாய் சேர்த்து கலக்கவும். அதில் மிளகாய் தூள், உப்பு, எலுமிச்சை சாறு சேர்த்து கிளறி வைக்கவும். சுவையான கருஞ்சுண்டல் தயார்.